Aplei naatėtėkėmus

BunkaSosėtėkėmė so kningas „Žemaičių kalba ir rašyba“ autuorio Jūzapu Pabrieža, anam papasakuojau sava spieliuojėma, kāp, mona kramė, atsėrada Plateliū ežera pavadėnėms.
„Rimta ruoda“, – rokava uns, doudams soprastė, ka vėskuo gal būtė.
Dabartious jau drosiau ė platiau galio vėsims pakartuotė, dėl kuo vuožuoju, ka legenda so teisybė šėik tėik prasėlenk.
Senūs žemielapiūs retā kor ī nupaišīta „Platel“. Daugiausē – „Plotel“.
Žīdā Platelius lig šiuo laika tabvadėn „Plotel“. Ka anėj nauduo senus pavadėnėmus, gal sprėstė eš Plungės vardą, katras žīdėškā ī „Plungiany“.
Tuoks bova pėrmasis miesta pavadėnėms – Plungienā. Arba žīdu atmintis geresnė, arba anėi ėžsėvežė tuoki pavadėnėma ė keravuo. Ba tuo, dar 1899 metās Plungės apžvalguo Aleksiejus Drobenko miesta vadėn Plungienās.
Ta gal ė Platelē pradiuo bova na „Pla…“, vo „Plo…“
Plateliū ežers ī unt kalna, katrōn padėrbėna slenkontis ledīns. Ežera vondou ī 150 metru vėrš jūras līgė, vo nu anuo krontū vondou nubieg ė vėsas posės kāp nu žōsėis.
Ka ledīns ėštėrpa, bėškis vondėns sobiega i dauba, katruo dabartious ī ežers. Bet reikiejė lauktė šimtmetius, kol lītaus ė šaltėniu vondou pripėldė dauba tėik, ka pėitėnem anuo galė prasėveržė Babrungs.
Tōn, ruoduos, tvėrtėn ė ežerė po vondėniu esonti Nalijas kalva, unt katruos archeoluogā rada spiejama akmėnimis apdieliuota Švėntvėitė. Vadėnas, ana bova sausomuo.
Pradiuo vondou rinkuos i žemesnės vėitas, ė bova na vėins dėdelis ežers, vo daug mažū vondėniu apsėmtū, opaliokās sosėjungusiu pluotieliu. Dėl tuo žmuonis anōn galiejė pavadintė Pluotieliu ežeru.
Gīdītuos, medicinas, humanėtarėniu ė teisės muokslu daktars, aušrėninks, lietoviu spauduos ė politinis veikies Juons Šliūps, XIX omžiaus pabaiguo ėš vuokietiu kalbuos versdams Edmunda Fekenšteta „Mitus, pasakas ė legendas Žemaitiu“, ėrgi raša na „Plateliai“, vo „Plotėliai“.
Vo kāp tumet su gražė legenda aplei debesi, katras tėik „platē lej“, ka padėrbėna ežera?
Ruoduos, anā trūkst luogikas. Jēgo, kāp sāka legenda, aplinkou gīvena žmuonis, ta vėita jau toriejė torietė pavadėnėma. Gal Plotieliu?
Kam šuovė ė kramė paimtė sāskombi „platē lej“ ė padėrbintė ruomantėška, bet mosintās so teisybė prasėlėnkonti pavadėnėma, vargē basožėnuosem…

Parašykite komentarą

Balsavimai

Plungės rajono savivaldybės administracijos specialistai pradėjo tikrinti, ar prie visų namų per valstybines šventes plėvesuoja trispalvės. Kaip tai vertinate?

Rezultatai

Loading ... Loading ...